Document Portal -- Government of Kerala

വൃദ്ധസദനങ്ങളുടെ പേര് സ്‌നേഹാലയം എന്ന് പുനർനാമകരണം ചെയ്ത സർക്കാർ ഉത്തരവ് നടപ്പിലാക്കും

സംസ്ഥാനത്തെ വയോജന സംരക്ഷണ കേന്ദ്രങ്ങളുടെ/വൃദ്ധസദനങ്ങളുടെ പേര് 'സ്‌നേഹാലയം' എന്ന് മാറ്റി പുനർനാമകരണം ചെയ്ത് സർക്കാർ ഉത്തരവ് പുറപ്പെടുവിച്ചിട്ടുണ്ട്. ഈ ഉത്തരവ് പ്രകാരം 'വൃദ്ധസദനം' എന്ന പ്രയോഗം ഔദ്യോഗിക രേഖകളിൽ നിന്നും പൊതുപ്രയോഗത്തിൽ നിന്നും പൂർണ്ണമായും ഒഴിവാക്കാൻ സർക്കാർ തീരുമാനിച്ചു.

നെയിം ബോർഡുകൾ, ഔദ്യോഗിക വെബ്‌സൈറ്റുകൾ, സർക്കാർ പ്രസിദ്ധീകരണങ്ങൾ, പൊതുജനങ്ങൾ ഉപയോഗിക്കുന്ന മറ്റ് രേഖകൾ, ആശയവിനിമയ സംവിധാനങ്ങൾ എന്നിവയിലെല്ലാം അടിയന്തരമായി 'സ്‌നേഹാലയം' എന്ന പുതിയ പേര് രേഖപ്പെടുത്തുന്നതിന് ഭരണപരമായ നടപടികൾ പൂർത്തിയാക്കാൻ സാമൂഹ്യനീതി വകുപ്പ് ഡയറക്ടർക്ക് സംസ്ഥാന മനുഷ്യാവകാശ കമ്മീഷൻ ജുഡീഷ്യൽ അംഗം കെ. ബൈജുനാഥ് കർശന നിർദ്ദേശം നൽകി.

'വൃദ്ധർ' എന്ന പദം മുതിർന്ന പൗരന്മാരിൽ അപകർഷതാബോധം ഉണ്ടാക്കുന്നതിനാൽ സ്ഥാപനങ്ങളുടെ പേര് മാറ്റണമെന്ന് ആവശ്യപ്പെട്ട് പ്രൊഫ. വർഗീസ് മാത്യു സമർപ്പിച്ച പരാതിയിലാണ് മനുഷ്യാവകാശ കമ്മീഷന്റെ പ്രധാന ഇടപെടൽ. 2024 ഡിസംബറിൽ തന്നെ പേരുമാറ്റ ഉത്തരവ് നിലവിൽ വന്നിരുന്നെങ്കിലും പൊതുപ്രയോഗത്തിലും ഔദ്യോഗിക മേഖലകളിലും ഇപ്പോഴും പഴയ പേര് തുടരുന്ന സാഹചര്യം ഒഴിവാക്കാൻ വ്യാപക ബോധവൽക്കരണം നൽകാനും കമ്മീഷൻ ആവശ്യപ്പെട്ടിട്ടുണ്ട്.

'വൃദ്ധസദനം' എന്ന പദം വയോജനങ്ങളിൽ മാനസികമായി അനാഥത്വവും അപകർഷതാബോധവും ഉണ്ടാക്കാൻ ഇടയാക്കാറുണ്ട്. 'സ്‌നേഹാലയം' എന്ന പോസിറ്റീവായ പേര് അന്തേവാസികൾക്ക് തങ്ങൾ പാർക്കുന്നത് ഒരു വിവേചന കേന്ദ്രത്തിലല്ല, മറിച്ച് സ്‌നേഹവും പരിഗണനയും ലഭിക്കുന്ന സ്വന്തം വീടുകളിൽ തന്നെയാണ് എന്ന ആത്മാഭിമാനവും സന്തോഷവും നൽകുന്നു. മുതിർന്ന പൗരന്മാരെ സമൂഹത്തിൽ മാറ്റിനിർത്തേണ്ടവരല്ല, മറിച്ച് ചേർത്തുനിർത്തേണ്ടവരാണ് എന്ന സന്ദേശം പൊതുസമൂഹത്തിലേക്ക് എത്തിക്കാൻ ഈ പേരുമാറ്റത്തിലൂടെ സാധിക്കുന്നു.

സ്ഥാപനങ്ങൾ സന്ദർശിക്കുന്ന ബന്ധുക്കൾക്കും പൊതുജനങ്ങൾക്കും ഇത്തരം കേന്ദ്രങ്ങളോടുള്ള സമീപനം കൂടുതൽ സൗഹൃദവും അനുകമ്പ നിറഞ്ഞതുമാക്കാൻ പുതിയ പേര് വഴിയൊരുക്കുന്നു.

31-07-2026