ബൾക്ക് വേസ്റ്റ് ജനറേറ്റേർഴ്‌സ് പാലിക്കേണ്ട കടമകളും ഉത്തരവാദിത്തങ്ങളും; മാർഗനിർദ്ദേശം അംഗീകരിച്ചു

വലിയ തോതിൽ മാലിന്യം ഉത്പാദിപ്പിക്കുന്നവർ പാലിക്കേണ്ട കടമകളും ഉത്തരവാദിത്തങ്ങളും സംബന്ധിച്ച് മാർഗനിർദ്ദേശം സർക്കാർ അംഗീകരിച്ച് ഉത്തരവ് പുറത്തിറക്കി. പ്രതിവർഷം കേരളത്തിൽ ഏകദേശം 25 ലക്ഷം ടൺ മാലിന്യമാണ് ഉണ്ടാകുന്നത്. ഇതിൽ 69 ശതമാനം ജൈവമാലിന്യമവും 31 ശതമാനം അജൈവമാലിന്യവുമാണ്. 2016ലെ ഖരമാലിന്യ പരിപാലന ചട്ടം അനുസരിച്ച് പ്രതിദിനം 100 കിലോഗ്രാം മാലിന്യം ഉത്പാദിപ്പിക്കുന്നുണ്ടെങ്കിൽ അവയെ വലിയ തോതിൽ മാലിന്യം ഉത്പാദിപ്പിക്കുന്നവരായി (ബൾക്ക് വേസ്റ്റ് ജനറേറ്റർ) കണക്കാക്കാം. തദ്ദേശ-പൊതുമേഖല-സ്വകാര്യ കമ്പനികളുടെ ഓഫീസുകൾ പ്രവർത്തിക്കുന്ന കെട്ടിടങ്ങൾ, ആശുപത്രികൾ, നഴ്‌സിങ് ഹോമുകൾ, സ്‌കൂളുകൾ, കോളേജുകൾ, യൂണിവേഴ്‌സിറ്റികൾ, സ്‌റ്റേഡിയങ്ങൾ തുടങ്ങി ബൾക്ക് വേസ്റ്റ് ജനറേറ്റർമാരും റസിഡന്റ് വെൽഫെയർ അസോസിയേഷനുകൾ, കോളനികൾ, ഹോട്ടലുകൾ തുടങ്ങിയവരും അജൈവമാലിന്യങ്ങൾ തദ്ദേശസ്വയം ഭരണ സ്ഥാപനങ്ങൾ നിയോഗിക്കുന്നവർക്ക് കൈമാറി, ജൈവമാലിന്യം ഉറവിടത്തിൽ സംസ്‌കരിക്കണം. ബൾക്ക് വേസ്റ്റ് ജനറേറ്റർമാർ പാലിക്കേണ്ട വ്യവസ്ഥകൾ സംസ്ഥാനത്ത് നടപ്പിലാക്കുന്നതിനായി 2024ൽ കേരള മുൻസിപ്പാലിറ്റി നിയമവും കേരള പഞ്ചായത്ത് രാജ് നിയമവും ഭേദഗതി ചെയ്യുകയും നിയമലംഘകർക്കു പിഴയും തടവും ഉൾപ്പെടെയുള്ള നടപടികൾ ഉൾപ്പെടുത്തുകയും ചെയ്തു. https://document.kerala.gov.in/documents/governmentorders//govtorder1703202415:12:20.pdf