Document Portal -- Government of Kerala

വയനാട് ദുരന്തബാധിതരായവരുടെ പുനരധിവാസം; മോഡൽ ടൗൺഷിപ്പ് നിർമിക്കുന്നതിന് ഉത്തരവായി

വയനാട് ജില്ലയിലെ വൈത്തിരി താലൂക്കിലെ വെള്ളാർമല വില്ലേജിൽ മേപ്പാടി ഗ്രാമപഞ്ചായത്തിൽ ദുരന്തബാധിതരായ ആളുകളുടെ പുനരധിവാസത്തിന് മോഡൽ ടൗൺഷിപ് നിർമിക്കുന്നതിന് അനുമതി നൽകി സർക്കാർക്കാർ ഉത്തരവായി. മേപ്പാടി പഞ്ചായത്തിൽ തന്നെയുള്ള നെടുമ്പാല എസ്റ്റേറ്റിലും കൽപ്പറ്റ മുൻസിപ്പാലിറ്റിയിലെ എൽസ്റ്റോൺ എസ്‌റ്റേറ്റിലും മോഡൽ ഠൗൺ ഷിപ്പ് നിർമിക്കാനാണ് സർക്കാർ അംഗീകാരം നൽകിയിട്ടുള്ളത്. ഇതനുസരിച്ച് 144.14 ഹെക്ടർ ഭൂമി ദുരന്തനിവാരണ നിയമം 2005 പ്രകാരം ഏറ്റെടുക്കുന്നതിനുള്ള നടപടികൾക്ക് അനുമതി നൽകിയിട്ടുണ്ട്.

ജനവാസ മേഖലകൾ ഒഴിവാക്കിയാണ് ഭൂമി ഏറ്റെടുക്കുന്നത്. ഇതിൽ നെടുമ്പാല എസ്റ്റേറ്റിലെ 65.41 ഹെക്ടർ ഭൂമിയും എൽസ്റ്റോൺ എസ്‌റ്റേറ്റിലെ 78.73 ഹെക്ടർ ഭൂമിയുമാണ് ഏറ്റെടുക്കുന്നത്. ദുരന്തത്തിൽ വീടും സ്ഥലവും നഷ്ടപ്പെട്ട കുടുംബങ്ങളെ ആദ്യഘട്ടത്തിൽ പുനരധിവസിപ്പിക്കും. വാസയോഗ്യമല്ലാതായി തീർന്ന സ്ഥലങ്ങളിൽ ഉൾപ്പെടുന്ന മറ്റ് കുടുംബങ്ങളെ രണ്ടാംഘട്ടത്തിൽ പുനരധിവസിപ്പിക്കും. പുനരധിവാസ പദ്ധതിയുടെ ആദ്യഘട്ടത്തിൽ 700 ഓളം കുടുംബങ്ങൾ ഉൾപ്പെടും.

ഗുണഭോക്താക്കളുടെ കരട് പട്ടിക കളക്ടർ തയാറാക്കി പ്രസിദ്ധീകരിക്കും തുടർന്ന് അന്തിമ പട്ടികയുടെ അടിസ്ഥാനത്തിലാകും പുനരധിവാസം.

പുനരധിവസിപ്പിക്കുന്ന ടൗൺഷിപ്പ് ഏതെന്ന് ദുരന്തബാധിതർക്ക് തെരഞ്ഞെടുക്കാം. നേരത്തെ മേപ്പാടിയിൽ തന്നെ താമസിക്കണമെന്ന് താൽപര്യമറിയിച്ച കുടുംബങ്ങളെ അവിടെയും മറ്റുള്ളവരെ കൽപ്പറ്റയിലുമാകും പുനരധിവസിപ്പിക്കുക. കളിസ്ഥലം, അങ്കണവാടി, സ്‌കൂൾ ,ആശുപത്രി പോലുള്ള പൊതുകെട്ടിടങ്ങളും കൂടി ഉൾപ്പെട്ട ടൗൺഷിപ്പ് റോഡ്, കുടിവെള്ളം, അടിസ്ഥാന സൗകര്യങ്ങളുമുള്ള മേഖലകളിലാണ് വരുന്നത്.

https://document.kerala.gov.in/documents/governmentorders/eofficeorder_31_0610202400:35:50.pdf

09-10-2024