Document Portal -- Government of Kerala

മുനമ്പം പാലത്തിന് അനുമതി നൽകി ഉത്തരവ്

കാസർഗോഡ് ജില്ലയിലെ ഉദുമയിലെ മുനമ്പം പാലം നിർമിക്കുന്നതിനായി സർക്കാർ അനുമതി നൽകി ഉത്തരവ് പുറപ്പെടുവിച്ചു.

ഉദുമ മണ്ഡലത്തിലെ ചെമ്മനാട്, ബേഡഡുക്ക പഞ്ചായത്തുകളെ ബന്ധിപ്പിക്കുന്ന മുനമ്പം പാലത്തിന് 1770 ലക്ഷം രൂപയുടെ ഭരണാനുമതി ആണ് പൊതുമരാമത്ത് വകുപ്പ് നൽകിയിരിക്കുന്നത്.

ചന്ദ്രഗിരി പുഴ രണ്ടായി പിരിയുന്ന സ്ഥാനത്ത് ചെമ്മനാട്, -ബേഡഡുക്ക പഞ്ചായത്തുകളെ ബന്ധിപ്പിക്കുന്ന പാലം യാഥാർഥ്യമാകുന്നതോടെ ജില്ലയുടെ മലയോര മേഖലയെ ജില്ലാ ആസ്ഥാനവുമായി എളുപ്പത്തിൽ ബന്ധിപ്പിക്കാൻ സാധിക്കും. നിലവിൽ പ്രദേശത്ത് കാൽനടയാത്രയ്ക്ക് മാത്രം അനുയോജ്യമായഒരു തൂക്കുപാലമാണുള്ളത്. എരിഞ്ഞിപ്പുഴ, കരിച്ചേരി എന്നിവിടങ്ങളിലെ പാലം വഴിയാണ് ഇവിടങ്ങളിലെ ജനങ്ങൾ കാസർകോടുമായി ബന്ധപ്പെടുന്നത്.

കാസർകോട് നിന്ന് ദേശീയപാത വഴി കുണ്ടംകുഴിയിലേക്ക് 28 കി.മീ. യാത്ര പാലം യാഥാർത്ഥ്യമായാൽ പകുതിയായി കുറയും. 18 കിലോമീറ്ററോളം ചുറ്റി വളഞ്ഞു യാത്രചെയ്യുന്നതിന് പകരം മുനമ്പം പാലം വഴി 2 കിലോമീറ്ററിൽ ചട്ടഞ്ചാലിൽ എത്താം. ജില്ലാ ആസ്ഥാനത്തുനിന്ന് മുന്നാട്, കുറ്റിക്കോൽ, പാണത്തൂർ, ബന്തടുക്ക തുടങ്ങിയ സ്ഥലങ്ങളിലേക്കും എളുപ്പത്തിൽ സഞ്ചരിക്കാൻ സാധിക്കും.

ജില്ലയിലെ പ്രധാന വിനോദ സഞ്ചാര കേന്ദ്രങ്ങളായ റാണിപുരം, ബേക്കൽ എന്നിവയുമായി ബന്ധപ്പെടാനും എളുപ്പമാകും. പാലം യാഥാർഥ്യമാകുന്നതോടെ നല്ലൊരു വിനോദസഞ്ചാര കേന്ദ്രമായി മാറ്റുന്നതിന് സഹായകമാകുന്ന ഭൂപ്രകൃതിയാണ് മുനമ്പം പ്രദേശത്തേത്തുള്ളത്.

https://document.kerala.gov.in/documents/governmentorders/govtorder0611202419:22:02.pdf

15-11-2024