Document Portal -- Government of Kerala

സംസ്ഥാനത്തെ മുഴുവൻ അങ്കണവാടികളെയും മെയിൻ അങ്കണവാടികളായി ഉയർത്തി ഉത്തരവ്

മെയിൻ അങ്കണവാടികളാക്കി മാറ്റാൻ സാധിക്കാത്ത എല്ലാ മിനി അങ്കണവാടികളും സറണ്ടർ ചെയ്യുന്നതിനുള്ള കേന്ദ്ര വനിതാശിശു വികസന മന്ത്രാലയത്തിന്റെ നിർദ്ദേശത്തെ തുടർന്ന് സംസ്ഥാനത്തെ എല്ലാ മിനി അങ്കണവാടികളെയും മെയിൻ അങ്കണവാടികളായി അപ്‌ഗ്രേഡ് ചെയ്ത് സർക്കാർ ഉത്തരവ് പുറത്തിറക്കി.

കേരളത്തിൽ മിനി അങ്കണവാടികളെല്ലാം പ്രവർത്തിക്കുന്നത് പിന്നാക്ക മേഖലകളിലാണ് ഇവ സറണ്ടർ ചെയ്താൽ അനുപൂരക പോഷഹാരം ഉൾപ്പെടെയുള്ള ഐസിഡിഎസിന്റെ സേവനങ്ങളും വകുപ്പ് വഴി നടപ്പാക്കുന്ന മറ്റ് പദ്ധതികളും മേഖലയിൽ ലഭിക്കാതെ വരും.നിലവിൽ 33,115 അങ്കണവാടികളാണ് സംസ്ഥാനത്തുള്ളത്. 2010ന് മുമ്പുള്ള ജനസംഖ്യ അടിസ്ഥാനത്തിലാണ് മിനി അങ്കണവാടികൾ അനുവദിച്ചത്. ഇവയിൽ ഭൂരിപക്ഷത്തിന്റെയും പ്രവർത്തന മേഖലയിൽ ഗുണഭോക്താക്കളുടെ എണ്ണം ആയിരത്തിലേറെയാണ്. ഈ സാഹചര്യത്തിലാണ് സംസ്ഥാനത്തെ 129 മിനി അങ്കണവാടികളെയും മെയിൻ അങ്കണവാടികളാക്കി ഉയർത്തുന്നതിന് കേന്ദ്രാനുമതി തേടിയത്.

മിനി അങ്കണവാടി വർക്കർമാർ സ്ത്രീകളുടെയും കുട്ടികളുടെയും ആരോഗ്യ പോഷണ നിലവാരം കാത്തുസൂക്ഷിക്കാനും, ശൈശവകാല പരിചരണവും വിദ്യാഭ്യാസവും ഉറപ്പുവരുത്തുന്നതിനുമായി ഒട്ടേറെ ചുമതലകൾ വഹിക്കുന്നു. ഇതിനുപുറമെയാണ് അങ്കണവാടികളുടെ പരിസരം വൃത്തിയാക്കൽ, കുട്ടികളുടെ ഭക്ഷണത്തിനായി സാധനസാമഗ്രികൾ ശേഖരിക്കൽ, കുട്ടികളുടെ ശുചിത്വം ഉറപ്പാക്കൽ ഉൾപ്പെടെ ചുമതലകളും നിർവഹിക്കുന്നത്. പദവി ഉയർത്തപ്പെടുന്നതോടെ ഈ അങ്കണവാടികളിൽ വർക്കർക്ക് പുറമെ ഹെൽപ്പറുടെ സേവനവും ലഭിക്കുന്നതോടെ പ്രവർത്തനം കൂടുതൽ കാര്യക്ഷമമാകും. ജീവനക്കാരുടെ വേതനവും ഉയരും. 1.14 കോടി രൂപ ചെലവ് വരുന്ന പദ്ധതിക്ക് ധനവകുപ്പ് നേരത്തെ അംഗീകാരം നൽകിയിരുന്നു.

https://document.kerala.gov.in/documents/governmentorders/govtorder0108202409:55:28.pdf

03-09-2024