പഴയ വാഹനങ്ങളുടെ ഫിറ്റ്‌നസ് ടെസ്റ്റ് ഫീസിനത്തിൽ വൻ ഇളവ് വരുത്തി ഉത്തരവ് പുറത്തിറക്കി സർക്കാർ

കേന്ദ്ര മോട്ടോർ വാഹന നിയമത്തിലെ ഭേദഗതികൾ മൂലം പഴയ വാഹനങ്ങളുടെ ഉടമകൾ നേരിടുന്ന സാമ്പത്തിക പ്രതിസന്ധിയും ഭരണപരമായ തടസ്സങ്ങളും പരിഹരിക്കുക എന്ന ലക്ഷ്യത്തോടെയാണ് സർക്കാർ പഴയ വാഹനങ്ങളുടെ ഫിറ്റ്‌നസ് ടെസ്റ്റ് ഫീസിനത്തിൽ വൻ ഇളവ് വരുത്തി ഉത്തരവ് പുറപ്പെടുവിച്ചത്. സംസ്ഥാനത്തെ സാധാരണക്കാരായ വാഹന ഉടമകളെ സഹായിക്കുന്നതിനായി, 10, 15, 20 വർഷം പിന്നിട്ട ട്രാൻസ്‌പോർട്ട് വാഹനങ്ങളുടെ ഫിറ്റ്‌നസ് സർട്ടിഫിക്കറ്റ് ഫീസിൽ കേന്ദ്രം വരുത്തിയ വർധനവ് പകുതിയോളം (50 ശതമാനം വരെ) വെട്ടിക്കുറയ്ക്കാൻ സർക്കാർ തീരുമാനിച്ചു. ഈ നടപടി ആയിരക്കണക്കിന് വാഹന ഉടമകൾക്ക് വലിയ സാമ്പത്തിക ആശ്വാസം നൽകുന്നതാണ്.

സർക്കാർ മേഖലയിലെ വാഹനങ്ങളുടെ കാര്യത്തിലും സുപ്രധാനമായ മാറ്റമാണ് ഈ ഉത്തരവിലൂടെ നടപ്പിലാകുന്നത്. 15 വർഷം കഴിഞ്ഞ എല്ലാ സർക്കാർ വാഹനങ്ങളും പൊളിക്കണമെന്ന കേന്ദ്ര നിർദ്ദേശം കേരളത്തിലെ പോലീസ്, ഫയർഫോഴ്‌സ്, വനം, ആരോഗ്യ വകുപ്പുകളുടെ പ്രവർത്തനത്തെ സാരമായി ബാധിക്കുമെന്ന് സർക്കാർ വിലയിരുത്തി. കുറഞ്ഞ കിലോമീറ്റർ മാത്രം ഓടിയതും മികച്ച കണ്ടീഷനിലുള്ളതുമായ ഇത്തരം വാഹനങ്ങൾ ഒഴിവാക്കുന്നത് ഖജനാവിന് കോടിക്കണക്കിന് രൂപയുടെ നഷ്ടമുണ്ടാക്കും. ഈ സാഹചര്യം മുൻനിർത്തി, കൃത്യമായ പുക പരിശോധന സർട്ടിഫിക്കറ്റും ഫിറ്റ്‌നസ് കണ്ടീഷനും ഉള്ള സർക്കാർ വാഹനങ്ങളുടെ രജിസ്‌ട്രേഷൻ കാലാവധി 15 വർഷത്തിൽ നിന്നും 20 വർഷമായി പുനർനിശ്ചയിച്ചു.

കേരള മോട്ടോർ വാഹന നിയമം, 1989-ൽ 98A എന്ന പുതിയ ചട്ടം ഉൾപ്പെടുത്തിക്കൊണ്ടാണ് ഈ ഭേദഗതി നടപ്പിലാക്കിയിരിക്കുന്നത്. ഇതനുസരിച്ച് സംസ്ഥാന സർക്കാർ, മുൻസിപ്പൽ കോർപ്പറേഷനുകൾ, മുൻസിപ്പാലിറ്റികൾ, പഞ്ചായത്തുകൾ, പൊതുമേഖലാ സ്ഥാപനങ്ങൾ, സ്വയംഭരണ സ്ഥാപനങ്ങൾ എന്നിവയുടെ ഉടമസ്ഥതയിലുള്ള വാഹനങ്ങൾക്ക് 15 വർഷത്തിന് ശേഷം അഞ്ച് വർഷത്തേക്ക് കൂടി രജിസ്‌ട്രേഷൻ പുതുക്കി നൽകുന്നതാണ്. എന്നാൽ ഫിറ്റ്‌നസ് ടെസ്റ്റിൽ പരാജയപ്പെടുന്ന വാഹനങ്ങൾ നിർബന്ധമായും സർക്കാർ അംഗീകൃത സ്‌ക്രാപ്പിംഗ് സെന്ററുകൾ വഴി പൊളിച്ചുനീക്കേണ്ടതാണ്. അതേസമയം, രാജ്യത്തിന്റെ സുരക്ഷയ്ക്കും ക്രമസമാധാന പാലനത്തിനുമായി ഉപയോഗിക്കുന്ന കവചിത വാഹനങ്ങൾ (Armoured vehicles) പോലുള്ള പ്രത്യേക വിഭാഗങ്ങളെ ഈ നിബന്ധനയിൽ നിന്നും ഒഴിവാക്കിയിട്ടുണ്ട്.

ഈ ഉത്തരവ് നടപ്പിലാക്കുന്നതിലൂടെ സ്വകാര്യ ട്രാൻസ്‌പോർട്ട് വാഹനങ്ങളുടെ ഫിറ്റ്‌നസ് ഫീസ് കുറയുന്നത് സാധാരണക്കാരുടെ യാത്രാച്ചിലവിലും ചരക്ക് നീക്കത്തിലും ആശ്വാസമാകും. സർക്കാർ വാഹനങ്ങളുടെ കാലാവധി നീട്ടുന്നത് വഴി പുതിയ വാഹനങ്ങൾ വാങ്ങുന്നതിനായി ഖജനാവിൽ നിന്നും ചിലവാകേണ്ട വലിയ തുക ലാഭിക്കാനും ആ തുക മറ്റ് വികസന പ്രവർത്തനങ്ങൾക്കായി വിനിയോഗിക്കാനും സാധിക്കുന്നു. കേന്ദ്ര വാഹന പോർട്ടലിലെ സാങ്കേതിക തടസ്സങ്ങൾ ഒഴിവാക്കാൻ ഇത്തരം വാഹനങ്ങൾക്ക് മോട്ടോർ വാഹന വകുപ്പ് പ്രത്യേക ലാമിനേറ്റഡ് ആർ.സി. കാർഡുകൾ നൽകുന്നതാണ്. കൂടാതെ ഇൻഷുറൻസ് പരിരക്ഷ ഉറപ്പാക്കാൻ ഈ വാഹനങ്ങളെല്ലാം കേരള സ്റ്റേറ്റ് ഇൻഷുറൻസ് ഡിപ്പാർട്ട്‌മെന്റിന് കീഴിലാക്കുകയും ചെയ്തു. പരിസ്ഥിതി സൗഹൃദപരമായ രീതിയിൽ പഴയ വാഹനങ്ങൾ കൈകാര്യം ചെയ്യണമെന്ന കാഴ്ചപ്പാടോടെയാണ് സർക്കാർ ഈ നടപടികൾ സ്വീകരിച്ചിരിക്കുന്നത്.

GO ORDER: G.O.(P)No.3/2026/TRANS