Document Portal -- Government of Kerala

നോർക്ക-ശുഭയാത്ര പദ്ധതി മാർഗ്ഗനിർദ്ദേശങ്ങൾ അംഗീകരിച്ച് സർക്കാർ ഉത്തരവിറക്കി

വിദേശ ജോലിയ്ക്ക് സഹായമേകുന്ന നോർക്കയുടെ ശുഭയാത്ര പദ്ധതി മാർഗ്ഗനിർദ്ദേശങ്ങൾ അംഗീകരിച്ച് സർക്കാർ ഉത്തരവിറക്കി. ശുഭയാത്ര പദ്ധതിക്കായി 2024-25 ബജറ്റിൽ 150 ലക്ഷം രൂപയാണ് വകയിരുത്തിയിട്ടുള്ളത്.

പ്രവാസി നൈപുണ്യ വികസന സഹായ പദ്ധതി, വിദേശ തൊഴിലിനായുള്ള യാത്രാ സഹായ പദ്ധതി എന്നീ രണ്ട് ലക്ഷ്യങ്ങളാണ് ശുഭയാത്രയ്ക്കുള്ളത്. സാമ്പത്തികമായി ബുദ്ധിമുട്ടുന്നവരെ വിദേശ ജോലിക്ക് സഹായിക്കുകയാണ് പ്രവാസി നൈപുണ്യ വികസന സഹായ പദ്ധതിയിലൂടെ ഉദ്ദേശിക്കുന്നത്. ഒരു നിശ്ചിത ജോലി (നഴ്‌സുമാർ, ഡോക്ടർ, പാരാമെഡിക്കൽ സ്റ്റാഫ്) ലഭിക്കുന്നതിന്, ഉദ്യോഗാർഥികൾക്ക് ഭാഷാ, നിയന്ത്രണ പരീക്ഷകളിൽ പങ്കെടുക്കുന്നതിന് പരിശീലനം ആവശ്യമാണ്. വിദേശ ജോലിക്ക് വേണ്ട നൈപുണ്യ വികസനത്തിനായി വേണ്ടി വരുന്ന ചെലവുകൾ (പരീക്ഷ പരിശീലനം, ഫീസുകൾ, പരിശീലന കാലത്തെ ഹോസ്റ്റൽ-ഭക്ഷണം) നടപ്പാക്കാൻ 2 ലക്ഷം രൂപ വരെ ധനകാര്യസ്ഥാപനങ്ങൾ വഴി ഈ പദ്ധതിയിലൂടെ ലഭ്യമാക്കുന്നു.

വിദേശ തൊഴിലിനായുള്ള യാത്രാ സഹായ പദ്ധതിയിലൂടെ ഇ-മൈഗ്രേറ്റ് സിസ്റ്റത്തിൽ പേര് പ്രദർശിപ്പിച്ചിട്ടുള്ളതും രജിസ്റ്റർ ചെയ്തതുമായ റിക്രൂട്ടിംഗ് ഏജന്റ് വഴി ലഭിക്കുന്ന ജോബ് ഓഫറിന്റെ അടിസ്ഥാനത്തിൽ തൊഴിൽ നേടുന്നവർക്ക് പ്രാരംഭ ചെലവുകൾക്കായി 2 ലക്ഷം വരെ വായ്പ ലഭ്യമാക്കുന്നു. റിക്രൂട്ടിങ് കമ്പനികൾക്കുള്ള സേവന നിരക്കുകൾ, വിസ സ്റ്റാമ്പിങ് നിരക്കുകൾ, മെഡിക്കൽ പരിശോധന നിരക്കുകൾ, അറ്റസ്‌റ്റേഷൻ നിരക്കുകൾ, വിമാന ടിക്കറ്റുകൾ, വാക്‌സിനുകൾ, ആർടിപിസിആർ തുടങ്ങിയ ചെലവുകൾ കുറഞ്ഞ വരുമാനമുള്ള കുടുംബങ്ങളിലെ അംഗങ്ങൾക്ക് ഒരുമിച്ച് വഹിക്കാൻ പ്രയാസമാണ്.

നോർക്ക റൂട്ട്‌സ്, ഭാവിയിൽ അവർക്ക് ലഭിക്കാവുന്ന ഒരു മാസത്തെ ശമ്പളത്തിന് ഏകദേശം തുല്യമായ ഒരു ചെറിയ തുകയാണ് ലോണായി നൽകുന്നത്. അപേക്ഷ www.norka.org ൽ സമർപ്പിക്കണം. നോർക്കയുടെ മറ്റ് പദ്ധതികൾ മുഖേന സഹായം ലഭിച്ചവരെ ഈ പദ്ധിയിൽ പരിഗണിക്കില്ല.

കോവിഡിന് ശേഷം കേരളത്തിൽ നിന്നുള്ള വിദേശ കുടിയേറ്റത്തിന് പുത്തൻ ഊർജ്ജം നൽകികൊണ്ടാണ് പ്രവാസികാര്യ വകുപ്പ് വിദേശജോലി തേടുന്നവർക്ക് സാമ്പത്തിക സഹായം നൽകുന്നതിന് പ്രത്യേക പദ്ധതി അവതിരിപ്പിക്കുന്നത്.

https://document.kerala.gov.in/documents/governmentorders/govtorder2410202418:36:48.pdf

30-10-2024