Document Portal -- Government of Kerala

ചെയര്‍മാന്‍ ഇനി ചെയര്‍ പേഴ്സണ്‍-ലിംഗനീതിയിലേക്ക് പുത്തന്‍ ചുവടുവെയ്പ്പ് ഉത്തരവ് പുറത്തിറങ്ങി

ഭരണരംഗത്തും ഔദ്യോഗിക രേഖകളിലും ലിംഗ നിഷ്പക്ഷത ഉറപ്പാക്കുന്നതിന്റെ ഭാഗമായി, 'ചെയർമാൻ' എന്ന പദത്തിനുപകരം ഇനി 'ചെയർപേഴ്‌സൺ' എന്ന് ഉപയോഗിക്കാൻ നിർദേശിച്ച് സർക്കാർ ഉത്തരവ്. സാമൂഹിക നീതി ഉറപ്പാക്കുന്നതിൽ പുരോഗമനപരമായ നിലപാട് പ്രകടമാക്കുന്നതാണ് ഉദ്യോഗസ്ഥ- ഭരണ പരിഷ്‌കാര (ഔദ്യോഗിക ഭാഷ) വകുപ്പ് പുറത്തിറക്കിയ സർക്കുലർ.

സർക്കാർ രേഖകളിലും വിവിധ പദവികളിലും ലിംഗപരമായ വേർതിരിവ് ഒഴിവാക്കുക എന്ന ലക്ഷ്യത്തോടെയാണ് ഈ ഉത്തരവ്്. നിലവിൽ വനിതാ കമ്മീഷൻ, യുവജന കമ്മീഷൻ തുടങ്ങിയ സ്ഥാപനങ്ങളുടെ അധ്യക്ഷസ്ഥാനത്ത് 'ചെയർപേഴ്‌സൺ' എന്ന പദവി ഉപയോഗിക്കുന്നുണ്ടെങ്കിലും, മുൻപ് രൂപീകരിച്ച പല കമ്മീഷനുകളിലും സർക്കാർ വകുപ്പുകളിലും 'ചെയർമാൻ' എന്ന പദം ഇപ്പോഴും നിലവിലുണ്ടായിരുന്നു. ഈ വൈരുദ്ധ്യം പരിഹരിച്ച് എല്ലാ തലങ്ങളിലും ഏകീകൃതമായ ലിംഗ നിഷ്പക്ഷ പദം കൊണ്ടുവരിക എന്നതാണ് ഉത്തരവിലൂടെ ലക്ഷ്യമിടുന്നത്.

എല്ലാ സർക്കാർ രേഖകളിലും, ഔദ്യോഗിക പദവികളിലും 'ചെയർമാൻ' എന്ന പദത്തിന് പകരം 'ചെയർപേഴ്‌സൺ' എന്ന് ഉപയോഗിക്കണം. ഇത് ഭരണതലത്തിൽ ലിംഗസമത്വം പ്രോത്സാഹിപ്പിക്കും.

'ചെയർമാൻ' എന്ന് രേഖപ്പെടുത്തിയ പഴയ നെയിം ബോർഡുകൾ ഇനി ഉപയോഗിക്കാൻ പാടില്ല. അവ മാറ്റി പുതിയ, ലിംഗ നിഷ്പക്ഷമായ പദവികൾ ഉൾക്കൊള്ളുന്ന ബോർഡുകൾ സ്ഥാപിക്കേണ്ടതാണ്.

ഭാഷാ മാർഗനിർദേശക വിദഗ്ധ സമിതിയുടെ ശുപാർശ അംഗീകരിച്ചുകൊണ്ടാണ് ഭരണപരിഷ്‌കാര വകുപ്പ് ഈ ഉത്തരവ് പുറത്തിറക്കിയിരിക്കുന്നത്.

ഈ ഉത്തരവ് ഒരു വാക്കിലെ മാറ്റത്തിനപ്പുറം, ലിംഗസമത്വത്തെക്കുറിച്ചുള്ള സാമൂഹിക അവബോധം വർദ്ധിപ്പിക്കുന്നതിനും ഭാഷാപരമായ ലിംഗവിവേചനം ഇല്ലാതാക്കുന്നതിനും വലിയ സംഭാവന നൽകും. ഇത് കേരളത്തെ കൂടുതൽ ലിംഗസമത്വമുള്ള സമൂഹമാക്കി മാറ്റുന്നതിന് സഹായിക്കും.സർക്കുലറിന്റെ പൂർണ്ണ രൂപം ഇവിടെ ലഭ്യമാണ്: https://document.kerala.gov.in/documents/circulars/circular0107202514:38:42.pdf

02-07-2025