Document Portal -- Government of Kerala

വനിതശിശുവികസന വകുപ്പിന്റെ ആശ്വാസ നിധി പദ്ധതി പരിഷ്‌കരണ ഭേദഗതി ഉത്തരവ് പുറപ്പെടുവിച്ചു

ലൈംഗികാതിക്രമങ്ങൾ, ആസിഡ് ആക്രമണങ്ങൾ, നിഷ്ഠൂരമായ കുറ്റകൃത്യങ്ങൾ, ജെൻഡർ ബെയ്‌സ്ഡ് അതിക്രമങ്ങൾ എന്നിവയ്ക്ക് ഇരയായിട്ടുള്ള സ്ത്രീകൾക്കും കുട്ടികൾക്കും ആശ്വാസമേകുന്ന ആശ്വാസനിധി പദ്ധതി പരിഷ്‌കരിച്ച ഭേദഗതി ഉത്തരവ് വകുപ്പ് പുറപ്പെടുവിച്ചു. പുതിയ ക്രിമിനൽ നിയമ വ്യവസ്ഥ പ്രാബല്യത്തിൽ വന്ന സാഹചര്യത്തിൽ ആണ് ആശ്വാസനിധി പദ്ധതിയിൽ വ്യവസ്ഥകൾക്ക് ഭേദഗതി വരുത്തിയത്.

ലൈംഗികാതിക്രമങ്ങൾ, ആസിഡ് ആക്രമണങ്ങൾ, ഗാർഹികപീഡനം തുടങ്ങിയവ അതിജീവിച്ച സ്ത്രീകൾക്കും കുട്ടികൾക്കും അടിയന്തിര ധനസഹായം നൽകുന്ന പദ്ധതിയാണ് ആശ്വാസനിധി. ഇത്തരം അതിക്രമങ്ങൾക്കിരയായവർക്ക് ഗുരുതരക്ഷതങ്ങളോ അനുബന്ധ അസുഖങ്ങളോ ഉണ്ടാകാറുണ്ട്. ഇവ കൃത്യസമയത്ത് ചികിത്സിക്കാനാണ് ധനസഹായം. പലർക്കും ജീവിതകാലം മുഴുവൻ മാനസികാരോഗ്യം നിലനിർത്തുന്നതിന് തുടർചികിത്സ ആവശ്യമായി വരാറുണ്ട്.വനിതാ സംരക്ഷണ ഓഫിസർ, ശിശു സംരക്ഷണ ഓഫിസർ തുടങ്ങിയവർ നൽകുന്ന അന്വേഷണ റിപ്പോർട്ട് അടിസ്ഥാനമാക്കി വനിതാ ശിശുവികസന വകുപ്പാണ് ധനസഹായം അനുവദിക്കുന്നത്.

2018ൽ ആരംഭിച്ച പദ്ധതിയിൽ കുടുംബവും സമൂഹവും അവഗണിക്കുന്ന ഇരകൾക്കാണ് പദ്ധതി താങ്ങാവുന്നത്. പോക്‌സോ കേസിലെ ഇരകളാണ് സഹായം ലഭിച്ചവരിലേറെയും. 25,000 രൂപ മുതൽ രണ്ടു ലക്ഷം വരെയാണ് അടിയന്തിര ധനസഹായമായി നൽകുന്നത്. അതിക്രമത്തിന്റെ സ്വഭാവം പരിഗണിച്ചാണ് ഓരോ അപേക്ഷയിലും തുക നിശ്ചയിക്കുന്നത്.

പൊലീസ് കേസ് രജിസ്റ്റർ ചെയ്ത് ആറു മാസത്തിനകം ജില്ലാ ശിശു / വനിതാ

സംരക്ഷണ ഓഫിസർക്ക് അപേക്ഷ നൽകണം.മെഡിക്കൽ റിപ്പോർട്ട്, ലീഗൽ റിപ്പോർട്ട്, പോലീസ് റിപ്പോർട്ട് എന്നിവ സഹിതമാണ് അപേക്ഷ നൽകേണ്ടത്. ഇവർ അന്വേഷിച്ച് സംസ്ഥാന നിർഭയ സെല്ലിലേക്ക് അപേക്ഷ കൈമാറും.ഇവിടെ അപേക്ഷ എത്തിയാൽ ഒരാഴ്ചയ്ക്കകം അതിജീവിതയുടെ അക്കൗണ്ടിൽ തുകയെത്തും.സ്ത്രീകൾക്ക് അവരുടെ ബാങ്ക് അക്കൗണ്ടിലേക്കും പ്രായപൂർത്തിയാകാത്ത കുട്ടികൾക്ക് അനുവദിക്കുന്ന തുക കുട്ടിയുടെയും രക്ഷിതാവിന്റെയും പേരിലുള്ള ബാങ്ക് അക്കൗണ്ടിലേക്കുമാണ് നൽകുക.

ജില്ലാതലത്തിലുള്ള അപേക്ഷകളിൽ ജില്ലാ സ്‌ക്രീനിംഗ് കമ്മറ്റിയുടെയും സംസ്ഥാനതല കമ്മിറ്റിയുടെയും സൂക്ഷമ പരിശോധനകൾക്ക് ശേഷമാകും അർഹതപ്പെട്ട തുക ശിപാർശ ചെയ്യുന്നത്. മറ്റു സംസ്ഥാനങ്ങളിലൊന്നുമില്ലാത്ത ആശ്വാസ നിധി പദ്ധതി സർക്കാരിന്റെ സ്വന്തം ഫണ്ടിൽ നിന്നാണ് തുകവിനിയോഗിക്കുന്നത്.

https://document.kerala.gov.in/documents/governmentorders/govtorder0901202509:19:59.pdf

01-03-2025