ആന്റിബയോട്ടിക് സ്മാർട്ട് കേരളം: ആശുപത്രികളുടെയും തദ്ദേശ സ്വയംഭരണ സ്ഥാപനങ്ങളുടെയും ഗുണനിലവാര സർട്ടിഫിക്കേഷനുള്ള സമഗ്ര പ്രവർത്തന മാർഗരേഖ

ആന്റിബയോട്ടിക്കുകളുടെ അമിതവും അശാസ്ത്രീയവുമായ ഉപയോഗം മൂലം മരുന്നുകൾക്ക് രോഗാണുക്കളെ നശിപ്പിക്കാനുള്ള ശേഷി നഷ്ടപ്പെടുന്ന 'ആന്റിമൈക്രോബിയൽ റെസിസ്റ്റൻസ്' (AMR) എന്ന നിശബ്ദ മഹാമാരിയെ പ്രതിരോധിക്കാൻ കേരളം ഒരുങ്ങുന്നു. ഇതിന്റെ ഭാഗമായി സംസ്ഥാനത്തെ ആശുപത്രികളെയും തദ്ദേശ സ്വയംഭരണ സ്ഥാപനങ്ങളെയും ആന്റിബയോട്ടിക് സ്മാർട്ട് ആക്കുന്നതിനുള്ള സമഗ്രമായ 'സ്റ്റാൻഡേർഡ് ഓപ്പറേറ്റിംഗ് പ്രൊസീജിയർ' (SOP) ആരോഗ്യ-കുടുംബക്ഷേമ വകുപ്പ് പുറത്തിറക്കി. ലോകത്തിലാദ്യമായി 'ആന്റിബയോട്ടിക് സാക്ഷര പഞ്ചായത്ത്' എന്ന ആശയം അവതരിപ്പിച്ചുകൊണ്ട് ഈ രംഗത്ത് കേരളം മാതൃകയാകുകയാണ്.

വൺഹെൽത്ത് സമീപനത്തിലൂടെ ജനങ്ങൾ, തദ്ദേശ സ്വയംഭരണ സ്ഥാപനങ്ങൾ, ആരോഗ്യ പ്രവർത്തകർ എന്നിവരെ ഏകോപിപ്പിച്ച് കേരളത്തെ ആന്റിബയോട്ടിക് സാക്ഷര സംസ്ഥാനമാക്കി മാറ്റുകയാണ് ഈ ദൗത്യത്തിന്റെ ലക്ഷ്യം. ആശുപത്രികളുടെ പ്രവർത്തനം വിലയിരുത്താൻ നിശ്ചിത മാനദണ്ഡങ്ങൾ നിശ്ചയിച്ചിട്ടുണ്ട്. നിശ്ചിത ഗുണനിലവാര മാനദണ്ഡങ്ങൾ പാലിക്കുന്ന ആശുപത്രികൾക്ക് സർട്ടിഫിക്കേഷൻ നൽകും.

ആന്റിബയോട്ടിക് സാക്ഷര തദ്ദേശ സ്വയംഭരണ സ്ഥാപനങ്ങൾ: ജനങ്ങളിൽ ബോധവൽക്കരണം നടത്തിയും നിയന്ത്രണങ്ങൾ ഏർപ്പെടുത്തിയും മാതൃകയാകുന്ന പഞ്ചായത്തുകൾക്കും നഗരസഭകൾക്കും അംഗീകാരം നൽകും. ഡോക്ടർമാർ നൽകുന്ന ആന്റിബയോട്ടിക്കുകളിൽ ഭൂരിഭാഗവും ലോകാരോഗ്യ സംഘടന നിർദ്ദേശിച്ച 'ആക്സസ്'വിഭാഗത്തിൽപ്പെട്ടവയാണെന്ന് ഉറപ്പാക്കും.

ആശുപത്രികളുടെ പ്രവർത്തനക്ഷമത പൊതുജനങ്ങൾക്ക് എളുപ്പത്തിൽ തിരിച്ചറിയാനായി ആകർഷകമായ 'കളർ കോഡിംഗ്' രീതി ഏർപ്പെടുത്തിയിട്ടുണ്ട്. മികച്ച രീതിയിൽ മാനദണ്ഡങ്ങൾ പാലിക്കുന്ന സ്ഥാപനങ്ങൾക്ക് ഇളം നീല (Light Blue) നിറം നൽകും. പ്രവർത്തന നിലവാരത്തിനനുസരിച്ച് ഡാർക്ക് ബ്ലൂ, ഗ്രീൻ, യെല്ലോ, പിങ്ക് എന്നിങ്ങനെ മറ്റ് ഗ്രേഡുകളും നൽകുന്നതാണ്. മൂന്ന് മാസത്തിനുള്ളിൽ എല്ലാ സർക്കാർ ആശുപത്രികളും ഈ സംവിധാനത്തിന് കീഴിൽ വരും.

ഈ പദ്ധതി നടപ്പിലാക്കുന്നതിലൂടെ രോഗികൾക്ക് അനാവശ്യമായി ആന്റിബയോട്ടിക്കുകൾ നൽകുന്നത് ഒഴിവാക്കപ്പെടുന്നു, ഇത് പാർശ്വഫലങ്ങൾ കുറയ്ക്കാൻ സഹായിക്കും. ഗുരുതരമായ രോഗങ്ങൾ വരുമ്പോൾ മരുന്നുകൾ ഫലിക്കാത്ത അവസ്ഥ വരാതിരിക്കാൻ ഈ കൃത്യമായ ഇടപെടൽ സഹായിക്കും. കളർ കോഡിംഗിലൂടെ ഏറ്റവും മികച്ച സേവനം നൽകുന്ന ആശുപത്രികളെ രോഗികൾക്ക് എളുപ്പത്തിൽ തിരിച്ചറിയാം.

ഡോക്ടറുടെ കുറിപ്പടിയില്ലാതെ മെഡിക്കൽ ഷോപ്പുകളിൽ നിന്ന് ആന്റിബയോട്ടിക്കുകൾ വാങ്ങുന്ന രീതി നിയന്ത്രിക്കപ്പെടുന്നതോടെ മരുന്നുകളുടെ ദുരുപയോഗം തടയാനാകും.ആധുനിക ചികിത്സാ രീതികളും ജനകീയ പങ്കാളിത്തവും സമന്വയിപ്പിക്കുന്ന ഈ പദ്ധതി, വരും തലമുറയ്ക്ക് കൂടി ഫലപ്രദമായ മരുന്നുകൾ ലഭ്യമാണെന്ന് ഉറപ്പുവരുത്തുന്ന കേരളത്തിന്റെ ചുവടുവെപ്പാണ്.

https://health.kerala.gov.in/assets/backend/uploads/alert/document_2_6965e9294c470.pdf