Document Portal -- Government of Kerala

കാട്ടുപന്നി ശല്യം തടയാൻ കർശന നടപടി: എംപാനൽ ചെയ്ത ഷൂട്ടർമാർക്ക് സംസ്ഥാനമൊട്ടാകെ പ്രവർത്തിക്കാൻ അനുമതി നൽകി സർക്കാർ ഉത്തരവ്

ജനവാസ മേഖലകളിൽ കൃഷിക്കും മനുഷ്യജീവനും സ്വത്തിനും വലിയ തോതിൽ നാശനഷ്ടങ്ങളുണ്ടാക്കുന്ന കാട്ടുപന്നികളെ വെടിവെച്ചു കൊല്ലാൻ തദ്ദേശ സ്വയംഭരണ സ്ഥാപനങ്ങൾ അംഗീകരിച്ച് പാനലിൽ ഉൾപ്പെടുത്തിയിട്ടുള്ള ഷൂട്ടർമാരുടെ പ്രവർത്തനപരിധി വിപുലീകരിച്ച് സർക്കാർ ഉത്തരവ് പുറപ്പെടുവിച്ചു. ഇനി മുതൽ ഏതെങ്കിലും ഒരു തദ്ദേശ സ്വയംഭരണ സ്ഥാപനം അംഗീകരിച്ച പട്ടികയിലുള്ള ഷൂട്ടർമാർക്ക് തങ്ങളുടെ പ്രാദേശിക അതിർത്തികളിലോ ജില്ലകളിലോ ഉള്ള പരിമിതികളില്ലാതെ സംസ്ഥാനത്തുടനീളം ആവശ്യാനുസരണം പ്രവർത്തിക്കാൻ അനുമതിയുണ്ടാകും.

ചീഫ് വൈൽഡ് ലൈഫ് വാർഡൻ സമർപ്പിച്ച ശിപാർശയുടെ അടിസ്ഥാനത്തിലാണ് വനം-വന്യജീവി (ഡി) വകുപ്പ് ഈ സുപ്രധാന തീരുമാനം കൈക്കൊണ്ടത്. മുൻപ് അതത് തദ്ദേശ ഭരണ സ്ഥാപനങ്ങളുടെ പരിധിക്കുള്ളിൽ മാത്രമായി ചുരുങ്ങിയിരുന്ന ഷൂട്ടർമാരുടെ സേവനം ഇനി മുതൽ തദ്ദേശ/ജില്ലാ അതിർത്തി ഭേദമന്യേ സംസ്ഥാനത്തുടനീളം വിനിയോഗിക്കാം. ഏതെങ്കിലും ഒരു തദ്ദേശ സ്വയംഭരണ സ്ഥാപനം തയ്യാറാക്കിയ അംഗീകൃത ഷൂട്ടർമാരുടെ പാനലിൽ പേരുണ്ടായിരിക്കണം എന്നതുമാത്രമാണ് പ്രധാന നിബന്ധന. കാട്ടുപന്നികളെ വെടിവെക്കാൻ ഉത്തരവിടാൻ തദ്ദേശ സ്വയംഭരണ സ്ഥാപന അധ്യക്ഷന്മാർക്ക് നൽകിയിട്ടുള്ള ഓണററി വൈൽഡ് ലൈഫ് വാർഡൻ അധികാരത്തിന്റെ കാലാവധി 2027 മേയ് 27 വരെ ദീർഘിപ്പിച്ചിട്ടുണ്ട്.

ഏതെങ്കിലും പ്രദേശത്ത് കാട്ടുപന്നി ശല്യം രൂക്ഷമാകുമ്പോൾ പ്രദേശികമായി ഷൂട്ടർമാരുടെ ലഭ്യതയില്ലെങ്കിലും സമീപ പ്രദേശങ്ങളിൽ നിന്നോ മറ്റ് പ്രദേശങ്ങളിൽ നിന്നോ ഷൂട്ടർമാരുടെ സേവനം തടസ്സമില്ലാതെ വേഗത്തിൽ ലഭ്യമാക്കാം. കൃഷിയിടങ്ങളിൽ കാട്ടുപന്നികൾ നടത്തുന്ന വ്യാപകമായ നാശനഷ്ടങ്ങൾക്ക് ഉടനടി പരിഹാരം കാണാൻ സാധിക്കുന്നത് കർഷകർക്ക് വലിയ ആശ്വാസമാകും. ജനവാസ മേഖലകളിൽ കാട്ടുപന്നികളുടെ ആക്രമണം മൂലമുണ്ടാകുന്ന അപകടങ്ങളും ജീവഹാനിയും സമയബന്ധിതമായ ഇടപെടലുകളിലൂടെ ഒഴിവാക്കാൻ സാധിക്കും. തദ്ദേശ അതിർത്തികളുടെ പേരിൽ മുൻപുണ്ടായിരുന്ന സാങ്കേതിക തടസ്സങ്ങളും കാലതാമസവും ഒഴിവാകുന്നതോടെ വന്യജീവി സംഘർഷ ലഘൂകരണ പ്രവർത്തനങ്ങൾക്ക് കൂടുതൽ വേഗത ലഭിക്കും. കാട്ടുപന്നി ശല്യം മൂലം ബുദ്ധിമുട്ടുന്ന മലയോര-തീരദേശ-ഗ്രാമീണ മേഖലകളിലെ കർഷകർക്കും പൊതുജനങ്ങൾക്കും ഒരുപോലെ ആശ്വാസമേകുന്ന നിർണ്ണായകമായ നടപടിയാണിത്.

07-08-2026