Document Portal -- Government of Kerala

വീടുകളിൽ വ്യവസായത്തിന് അനുമതി; പുതിയ നയങ്ങളുമായി തദ്ദേശസ്വയംഭരണ വകുപ്പിന്റെ ഉത്തരവ്

വീടുകളിൽ ഉൾപ്പെടെ പഞ്ചായത്തുകളിൽ നിന്ന് അംഗീകൃത നമ്പർ ലഭിച്ചിട്ടുള്ള കെട്ടിടത്തിൽ സംരംഭം ആരംഭിക്കാൻ അനുമതി. കെട്ടിട നിർമാണ ചട്ടം പ്രകാരമുള്ള വിനിയോഗ (ഒക്യുപെൻസി) വ്യവസ്ഥ കണക്കിലെടുക്കാതെ തന്നെ മലിനീകരണ നിയന്ത്രണ ബോർഡിന്റെ വൈറ്റ്, ഗ്രീൻ വിഭാഗത്തിൽപ്പെട്ട സംരംഭങ്ങൾക്കാണ് ലൈസൻസ് അനുവദിക്കുക.

വ്യവസായ സൗഹൃദ നടപടികളുടെ ഭാഗമായി, കേരള പഞ്ചായത്ത് രാജ് (സംരംഭങ്ങൾക്ക് ലൈസൻസ് നൽകൽ) ചട്ടം പ്രകാരമാണ് നിരവധി പേർക്ക് സഹായകരമാകുന്ന നടപടി. ഇതു സംബന്ധിച്ച ഉത്തരവ് പുറത്തിറക്കി. ചട്ടം വിജ്ഞാപനം ചെയ്യുന്നതോടെ പ്രാബല്യത്തിലാകും. അപാർട്ട്‌മെന്റ്, റെസിഡൻഷ്യൽ ഫ്‌ലാറ്റ്, ലോഡ്ജ്, ടൂറിസ്റ്റ് ഹോം, റിസോർട്ട്, ഹോസ്റ്റൽ തുടങ്ങിയവക്ക് ഈ ഇളവ് ബാധകമല്ല.

സോപ്പ് നിർമാണം, ചെറുകിട റസ്റ്ററന്റ്, ചപ്പാത്തി നിർമാണം, ചെരുപ്പ് നിർമാണം, കാർബോർഡ്, പേപ്പർ ഉൽപ്പന്നങ്ങൾ, മെഡിക്കൽ ഓക്സിജൻ, അക്ഷയ, ഇ സേവന കേന്ദ്രങ്ങൾ തുടങ്ങി 136 സംരംഭങ്ങളാണ് മലിനീകരണ നിയന്ത്രണ ബോർഡിന്റെ വൈറ്റ് വിഭാഗത്തിൽ ഉൾപ്പെടുന്നത്. ഓട്ടോമൊബൈൽ വർക്ക്ഷോപ്പ്, മുട്ട പായ്ക്കിങ് കേന്ദ്രം, ബേക്കറി, മധുര പലഹാര നിർമാണം, കയർ ഉൽപ്പന്നങ്ങൾ, കോൾഡ് സ്റ്റോറേജ്, ഭക്ഷ്യസംസ്‌കരണ യൂണിറ്റ്, ഫ്‌ലോർ മിൽ, ഫർണിച്ചർ നിർമാണം, ആയുർവേദ, യുനാനി മരുന്ന് നിർമാണം, തടിമിൽ, ബ്യൂട്ടി പാർലർ, കാറ്ററിങ് യൂണിറ്റ് തുടങ്ങി 201 സംരംഭങ്ങളാണ് ഗ്രീൻ വിഭാഗത്തിലുള്ളത്. മലിനീകരണ നിയന്ത്രണബോർഡിന്റെ പട്ടികയിൽ ഉൾപ്പെടാത്ത സംരംഭങ്ങളിൽ ഉദ്യോഗസ്ഥർ പരിശോധന നടത്തി വിവിധ മലിനീകരണതോത് നിശ്ചയിച്ച് ഏത് കാറ്റഗറിയിൽ ആണെന്ന് നിർണയിക്കും.

നിലവിൽ വീടുകളിൽ പ്രവർത്തിക്കുന്ന കുടിൽ വ്യവസായങ്ങൾക്കും വീടുകളിലെ മറ്റ് വാണിജ്യ സേവന പ്രവർത്തനങ്ങൾക്കും ലൈസൻസ് നൽകാൻ വ്യവസ്ഥയില്ല. ഇതുമൂലം പല ആനുകൂല്യങ്ങളും ലഭിക്കാത്ത പ്രശ്‌നം പരിഹരിക്കാൻ കൂടിയാണീ തീരുമാനം. ആൾത്താമസമില്ലാത്ത വീടാണെങ്കിൽ വീട് പൂർണമായും വ്യവസായത്തിനുപയോഗിക്കാൻ സാധിക്കും. ആൾത്താമസമുള്ള വീടാണെങ്കിൽ 50% സ്ഥലവും സംരംഭത്തിനായി ഉപയോഗിക്കാം. എം എസ് എം ഇ സെക്റ്ററിൽ ഇപ്പോഴുണ്ടായിക്കൊണ്ടിരിക്കുന്ന കുതിപ്പിന് ഇനിയും വേഗത വർധിപ്പിക്കുന്നതാണ് ഈ ചുവടുവെപ്പ്.

21-08-2025